Tanaga | Tula | Poem

Titig mong nakakalusaw
Puso ko’y sabik at uhaw
Pintig nito’y sinisigaw
Ikaw lamang araw-araw
Simbuyo ng damdamin
Huwag mong pairalin
Kawangis nito’y pighati
Luha’y ikubli sa ngiti

A tanaga is a short poetic form that’s the Filipino equivalent of the Japanese haiku. It is an untitled poem of four lines with each line equally having seven to nine syllables.

Tanaga | Tagalog |Poem

Sa aking pag-iisa,
Ako ay umaasa,
Na ika’y makapiling,
Bisig mo’y tanging hiling.
Samyo ng iyong halik
Sana ito’y ibalik
Alaala mo mahal
Ang lakas ko sa twina.
Minsan ko nang hiniling
Sa langit na ibalik
Ating pagmamahalan
at ako’y ‘yong balikan.

A tanaga is a short poetic form that’s the Filipino equivalent of the Japanese haiku. It is an untitled poem of four lines with each line equally having seven to nine syllables.

Liwanag sa Hardin


Sa parang ako’y isang magandang bulaklak;
Nagpapaganda sa masalimoot mong buhay.
Tangan ang kislap ng pag-asa;
Humahalimuyak sa bakuran mong kaylumbay.

Maaaninag ang tunay na ganda;
Kung ako’y iyong pagmamasdan ng husay.
Mapapawi ang lungkot at pighati sa buhay;
Kusang sisilay ang ngiti sa mga labi.

Halina’t ako’y iyong pagmasdan;
Sabay nating harapin ang bukas.
Nang may tuwa at pag-asa;
Panghawakan ang liwanag na dala ko.

Pagkat kislap na aking taglay;
Walang sinumang makakapantay.
Samyo ng aking pag-ibig;
Kusa mong madarama sa tuwina.

Sa tuwing lagi mo akong kapiling;
Hindi ko hahayaang ika’y malungkot.
Susulitin natin bawat araw na magkapiling;
Gagawin natin itong masaya at makulay.

Sa aking paglalagi sa mundong ito;
Tanging hiling ko’y maging matagumpay ka.
Sa bawat unos na iyong tatahakin;
Alalahanin mong ako’y laging nandito.

Patuloy kong iilawan ang landas mo;
Tungo sa buhay na pinakaaasam mo.
Ako’y patuloy na magniningning sa hardin mo;
Upang maging ilaw sa iyong paglalakbay.

Hardin mo’y mananatiling makulay;
Hangga’t ako’y narito.
Panghawakan bawat pag-asa na iyong natatanaw;
Kasama mo ako saan ka man magtungo.

Tatanawin kita sa malayo;
Ipapanalangin ang iyong landas.
Tungo sa mahusay at maunlad na pakikibaka;
Mapapagtagumpayan mo lahat ng pakikibaka.

Sa iyong pakikibaka sa buhay;
Lagi mong tatanawin ang iyong adhikain.
Upang landas mo ay hindi malihis.
Lumakad ka sa paglalakbay na taglay ang liwanag ko.


•Poetry•
#Tagalog

Tayo nang Maglayag

Kaygandang pagmasdan ang mga bangkang naglalayag sa dagat.
Tila ba nag-uusap sila at nagkakaunawaan.
Habang pinagmamasdan ko ang bangka,
Bigla akong napatanong sa aking sarili,
Saan patungo ang bangkang iyon?
Tila ba hindi niya alintana ang kanyang susuungin.

Sa kabilang dako ng aking isipan,
Saan nga ba patungo ang buhay ko?
Ang araw ay sisikat sa Silangan,
At lulubog sa kanluran.
Gigising sa umaga
At tutulog pagdating ng gabi.

Hindi gaya ng isang bangka,
Patuloy na naglalayag sa dagat,
Banayad man at masungit ang dagat,
Ang bangkang iyon ay nanatiling matatag.
Hindi alintana ang lakas ng alon,
Bagkus nagpaubaya at nagpatianod nalang.

Gaya ng buhay,
Na sa bawat pagsubok,
Manatiling matatag at lumaban.
Hindi basta susuko,
Sapagkat ito ay magiging sandata,
Sa mga hamon sa buhay.

Hindi sa lahat ng pagkakataon tayo ay nasa pighati,
Maging bukas upang harapin ang umaga,
Marahil ito ay hindi kasing-ganda,
Ito naman ay umpisa upang makita ang pag-asa,
Kung sa pagkatapos ng ulan ay may bahaghari,
Mayroong Diyos pagkatapos ng sakit at pighati.

Ang paglalayag sa dagat ay pangarap ko,
Ito ang susubok sa tatag ng aking pakikibaka sa buhay.
Ang dagat at ang bangka ang buhay na kinagisnan ko,
Upang maging matatag at matapang,
Dito ko napatunayan na ang pag-abot sa pangarap ay nangangailangan ng tapang at tiyaga.
Makibaka para sa pangarap.

Patuloy akong maglalayag tungo sa aking pangarap,
Upang silayan ang ganda ng mundo,
Upang suungin ang gabundok na alon,
Upang maging matapang at matatag,
Upang iahon ko ang aking pamilya sa abang buhay,
At ibigay ang maaliwalas na buhay sa kanila.